Alþjóða dansdagurinn 29. apríl

Á hverju ári þann 29. apríl er haldið uppá Alþjóða dansdaginn útum allan heim en það er Alþjóðlega leikhússtofnunin ITI -International Theatre Institute sem skipuleggur daginn og fær einhvern þekktan einstakling úr dansheiminum til að skrifa ávarp í tilefni dagsins.
Ávarp ársins 2021 má lesa hér fyrir neðan í þýðingu Steinunnar Kristínar Þorvaldsdóttur.

Höfundur orðsendingar alþjóðlega dansdagsins, 29. apríl árið 2021:
Friedemann VOGEL frá Þýskalandi
Ballettdansari

Orðsending í tilefni alþjóðlega dansdagsins eftir Friedemann VOGEL

Allt byrjar með hreyfingu – eðlishvöt sem er okkur öllum sameiginleg – og dansinn er hreyfing sem er öguð til þess að miðla. Óaðfinnanleg tækni er vissulega mikilvæg og tilkomumikil, en þegar allt kemur til alls þá skiptir það sem dansarinn tjáir inni í hreyfingunni öllu máli.
Sem dansarar erum við stöðugt á hreyfingu í þeim tilgangi að reyna að skapa þessar ógleymanlegu stundir. Sama hver danstegundin er, þá er þetta drifkraftur allra dansara. Þegar leikhúsum hefur svo allt í einu verið lokað og hátíðum frestað og við megum ekki koma fram
lengur, þá hefur heimurinn okkar stöðvast. Engin líkamleg snerting. Engar sýningar. Engir áhorfendur. Aldrei fyrr í manna minnum hefur danssamfélagið staðið frammi fyrir jafn sameiginlegri áskorun um að halda áhuganum vakandi og finna tilvistarlegan tilgang okkar.
Það er samt einmitt þegar eitthvað dýrmætt hefur verið tekið frá okkur sem við gerum okkur raunverulega grein fyrir mikilvægi verka okkar og hve mikla þýðingu dansinn hefur fyrir allt samfélagið. Dönsurum er oft hampað fyrir líkamlega færni sína þegar reyndin er sú að oftast er
það frekar andlegi styrkurinn sem heldur okkur gangandi. Ég tel að það sé þetta einstaka sambland af líkamlegri og sálrænni snerpu sem muni hjálpa okkur að sigrast á ástandinu og endurskapa okkur til að við getum haldið áfram að dansa og veita innblástur.

Hér má lesa ávarpið á ensku á vef ITI
https://www.international-dance-day.org/messageauthor.html